لازم نحلم للشاعر المبدع محمد الشرقاوي
قصيدة للشاعر محمد الشرقاوي
---------------------------------------------------
لازم تحلم
مهما يكون الحلم بعيد
لازم ترسم
بعد كفاحك بسمة وعيد
لازم بكرة
الغنوة تبان
تبقى لكل
الناس عنوان
جوه البيت
وفي كل ميدان
والأفراح
وياها تزيد
لازم تحلم
مهما يكون الحلم بعيد
-------------------------------------------------
لازم تحلم
حتى إن قالوا الحلم محال
لازم تكتب
أحلى قصايد للأجيال
تصنع بيها
أمل بسام
تهرب بيها
من الأوهام
أول كل
حقيقة كلام
أول كل
إجابة سؤال
لازم تحلم
حتى إن قالوا الحلم محال
--------------------------------------------------
لازم تحلم
حتى إن حلفوا بكل كتاب
لازم صوتك
يغلب كل كلام كداب
ربنا خلقك
حر بجد
طير بجناحك
واعبر سد
واصنع يومك
وارسم يد
تحذف كل جراح وضباب
لازم تحلم
حتى إن حلفوا بكل كتاب
--------------------------------------------------
لازم تحلم
حتى إن عشت مع الأفكار
لازم تعرف
بعد الليل بيهل نهار
سيبك من
صحبة مجانين
عاشوا العمر
في نوم تايهين
كل حياتهم
بكا وأنين
ضاعوا وكتبوا
كتير أوزار
لازم تحلم
حتى إن عشت مع الأفكار
--------------------------------------------------
لازم تحلم
مهما عيون الناس خدعوك
مهما إديتهم
عند الشدة يا صاحبي باعوك
دنيا غرورة
وحالها عجيب
تشهد حق
تعيشها غريب
ما لك فيها
حظوظ ونصيب
واسأل ليه الصحبة سابوك
لازم تحلم
مهما عيون الناس خدعوك
------------------------------------------------
لازم تحلم
مهما شربت بحور الصبر
لازم تعرف
بعد الجرح يهل النصر
يأسك يصنع
حزن وموت
ألمك يرسم
بكا وسكوت
تفضل واقف
هنا ما تفوت
ولا هتلاقي لهمك حصر
لازم تحلم
مهما شربت بحور الصبر
-------------------------------------------------
تعليقات
إرسال تعليق