مش مبسوط للمبدع الشاعر جمال ذكي عينر
انا مخنوق انا مش مبسوط
حاسس إني بجد بموت
ليه الدنيا ضاقت في عينيه ؟
زي ما اكون عايش في تابوت
كنت زمان عايش متهني
كانت الضحكة قريبة مني
ليه دلوقتي حياتي عذاب ؟
ليه على أملي حعيش مستني ؟
كنت اما القى دموع في عينيه
القى حبايبي كتير حواليا
ليه دلوقتي ما بالقاش حد ؟
مرة يفكر يسال فيا
ارحمي ضعفي يا دنيا وحني
دايما ليه بتخيبي ظني ؟
بافتح ليكي ايديا يا دنيا
وانتي يا قاسية بتهربي مني
امتى يا دنيا تزورني الفرحة ؟
امتى تفوتني حياتي الجارحة
نفسي الاقيكي يا دنيا ف كوشة
زي عروسة ولابسة الطرحة
قطر العمر اهو عدى وفات
زي ما باصبح زي ما ابات
اهي ايام وسنين بتعدي
وبكره يقولوا الراجل مات
اهي ايام وسنين بتعدي
وبكره يقولوا الراجل مات
بقلمي الشاعر جمال زكي عينر
تعليقات
إرسال تعليق