اد ايه القلب يعشق للمبدع الشاعر محمود بدر يونس عبد الجليل الشاعر
ياسلااااااام_____ أد إيه والغنوة تحلى
لو بدينا بالسلام _______ياسلااااااااام
أد إيه الروح تميل والنغم يطلع جميل
والوتر يوصل كلامه للقلوب صافى وأصيل
أد إيه وأد إيه بس اقول إيه ولا إيه
السلام ده كلمة خضرة زى أغصان الريحان
ترتوى منها الشفايف لما تجرى ع اللسان
ذوقوكى الناس يا دنيا بالكلام عن السلام
والكلام غير الحقيقة والعمل غير الكلام
ياسلام من هنا نبتدى الكلام ياصبابة يامغرمين
كلنا نحب السلام والسلام بيحب مين ؟
السلام بيحب نورا وشوفوا نورا تبقى مين؟
نورا بنت عيونها خضرة زى قلب العاشقين
والخدود وردية خمري والشفايف توت وتين
والضفاير تبر طاير يبعت النور والرنين
والنهود حراس مدينة بالبنادق سهرانين
يحرسوا قلب المدينة من عيون البصاصين
والمدينة فى عصر نورا صوروها المنشدين
هى جنه إنسانية للبنية وللبنين
فيها غيط القمح كافي يدى كل المحتاجين
فيها نهر الحب وافي يسقى كل العطشانين
فيها نور البدر صافى يهدى كل الحيرانين
فيها مطرح للسلام لو فرش يقدر ينام
فيها كل الناس حبايب فيها كل الناس تمام
ياسلام أد إيه القلب يفرح لو يزور بيتنا السلام
ييجى ومعاه الحبايب نورا والنور والكلام
لافرش الأرض الحبيبة حنة وأعمل مشايات
وأنصب الشادر يلالى بالكهارب والزينات
وأسقى كل الناس حبايبي مية وردى ف الكاسات
وادعى كل عيال حارتنا بالمزاهر والنايات
ينشدوا الألحان فرايحي تسرى ف قلوب البنات
تعمل الأنغام عمايل ترسم الأحلام حاجات
لو قالوها لأمهاتهم أو عادوها للخالات
يفهموها ويداروها عن عيون الأبهات
ويقوموا لها ويقعدوا لها ويغزلوا لها الأمنيات
والربيع يوصل مادام ف الوجود نسمة سلام
والزهور تطرح جناين والعبير يرسم حمام
زوقوكى الناس يادنيا بالكلام عن السلام
والكلام غير الحقيقة والعمل غير الكلام _ يا سلاااام
تعليقات
إرسال تعليق